ඉන්දියානු සාගරය සාම කලාපයක් ලෙස පවත්වාගෙන යෑමට ශ්‍රී ලංකාව සහ ඉන්දියාව සමීපව කටයුතු කරන බව ජනාධිපති ගෝඨාභය රාජපක්ෂ මහතා ඉන්දීය අගමැති නරේන්ද්‍ර මෝදී සමග අද (29) පැවැති සාකච්ජාවෙන් අනතුරුව මාධ්‍ය වෙත අදහස් දක්වමින් සඳහන් කළා.
ශ්‍රී ලංකාවේ සංවර්ධන කටයුතු සහ ආර්ථික සංවර්ධනය සඳහා ඉන්දියාව විසින් අමෙරිකානු ඩොලර් මිලියන 400ක ණය මුදලක් ලබාදුන් බවත්, ඉන් ඩොලර් මිලියන 50ක් ජාතික ආරක්ෂාව වෙනුවෙන් ලබාදුන් බවත් ජනාධිපති ගෝඨාභය රාජපක්ෂ මහතා කියා සිටියා.
පසුගිය අප්‍රේල් 21 වැනිදා එල්ලවූ ත්‍රස්ත ප්‍රහාරයෙන් පසුව ඉන්දියාව, ශ්‍රී ලංකාවට ලබාදුන් සහාය සම්බන්ධයෙන්ද ජනාධිපති ගෝඨාභය රාජපක්ෂ මහතා ඉන්දියාවට සිය ස්තුතිය පළකරනු ලැබුවා.
එසේම ඉන්දීය අගමැති නරේන්ද්‍ර මෝදී මහතාට ශ්‍රී ලංකාවේ සංචාරයක් සඳහා පැමිණෙන ලෙසද මෙහිදී ජනාධිපති ගෝඨාභය රාජපක්ෂ මහතා ඇරයුම් කර සිටියා.
ධීවර ගැටලුව සම්බන්ධයෙන් ද මෙහිදී දෙරටේ නායකයන් අතර සාකච්ජා සිදුවුණු අතර, ශ්‍රී ලංකාව භාරයේ තිබෙන ඉන්දීය ධීවර යාත්‍රා නිදහස් කිරීමට පියවර ගන්නා බව ජනාධිපති ගෝඨාභය රාජපක්ෂ මහතා සඳහන් කළා.
